Pastillas whistleblower pinagdudahan ng solon
MAGHAHAIN ng resolusyon ang isang Kongresista para siyasatin ang motibo ni Immigration officer Allison Chiong sa pagsisiwalat sa tinatawag na Pastillas anomaly sa Bureau of Immigration. Ayaw munang magpabanggit ng pangalan ang House of Representative hangga’t ‘di pa niya naihaharap ang resolusyon. Pero bakit sisiyasatin ang isang nagbunyag ng katiwalian na ngayo’y nasa pag-iingat na ng witness protection program?
Mukha raw kasing political demolition ng mga “dilawan” ang pagbubunyag ni Chiong. Aniya bigla na lamang nagpunta si Chiong sa opisina ni Sen. Risa Hontiveros bitbit ang pastillas story na kaduda-duda ang timing. Parang itinaon, ilang araw bago gunitain ang EDSA Revolution. Ang issue ay may kinalaman sa panunuhol ng mga illegal Chinese sa mga tauhan ng immigration para makapagtrabaho sa tinatawag na POGO o Philippine Offshore Gaming Operations, kahit walang visa.
Naka-disguise umano ang bribe money na kendi porke binilot na parang pastillas. Ilang araw ring namayagpag sa media ang kontrobersyal na balitang ito at sinibak pa ni President Duterte ang mga immigration people na dawit sa iregularidad.
“Kung tama ang duda ng maraming mambabatas sa agenda nitong tinawag sa Senado na whistleblower sa BID ay huhubaran natin siya ng maskara,” pahayag ng kongresista. Dagdag niya, kung totoong batid na ni Chiong ang anomalya noon pa man, “bakit ngayon lang siya lumantad?” Halata raw na ang exposé ay may intensyong siraan ang administrasyon. Baka raw sa pamamagitan nito ay magkatsamba ang oposisyon sa pagdaraos ng EDSA 3, pabirong Sabi ni Cong.
Sabi pa ng kongresista, si Chiong ay naempleyo sa BID noong 2012 na panahon ng mga ‘dilawan’. At noong nagdaang halalan, lantaran ito umanong nangampanya laban kay Sen. Ronald dela Rosa gamit ang isyung ‘tokhang’ sa ilegal na droga.
Idinagdag pa ng kongresista na sa House hearing ay ipasasagot din umano niya kay Chiong kung totoo ang mga alegasyon na habang nasa panunungkulan sa gobyerno ay dumanas ito ng depresyon at rehabilitasyon sa sobrang paggamit ng mga ilegal na droga.
- Latest
