Mga posibleng epekto sa pagsasara ng ABS-CBN
MAY dalawang posibleng mangyayari kapag isinara ng pamahalaan ang giant network na ABS-CBN: Ito ay ang pagsisimula ng pagsupil sa kalayaan sa pamamahayag at; ang pagdagsa ng mga tambay dahil marami ang mawawalan ng trabaho. Hindi biro ang bilang ng manggagawa na maaalis sa trabaho kapag nagsara ang network. Tinataya ito sa 11-libo katao na ang mahigit anim na libo ay mga regular na empleyado.
Bukod sa dalawang usaping iyan, apektado rin nito sa libu-libong konsyumer, ayon kay Louie Montemar, Convenor ng BantayKonsumer, Kuryente, Kalsada (BK3). Aniya, nasa higit anim na libong (6,730) regular na empleyado ang mawawalan ng trabaho kapag biglang nagsara ang nasabing kompanya. Ibig sabihin, malaking problema iyan mismo ng pamahalaang nagpapasara sa malaking kompanyang ito.
Kung susumahin, ang mga pamilyang maaring direktang tamaan ay hindi bababa sa mahigit 60,000 tao, ayon kay Montemar. Aniya “Ito ay isang malubhang usaping pang-ekonomiya”. Dagdag niya, mawawalan ng tiwala ang mga investors porke tanda ito ng kawalang katiyakan sa pagnenegosyo sa bansa. Mantakin nga naman na ang ating mga regulasyon ay basta na lamang nababalewala dahil sa napakapersonal na desisyon ng nakaupo.
Ipinahahatid ng BK3 ang pagsuporta sa panawagan ng mga empleyado ng ABS-CBN at milyun-milyong tagapagtangkilik nito na bumubuhay sa industriya. “Ipakita natin ang ating suporta sa ABS-CBN,” ayon sa grupo, “Ipaabot sa liderato ng administrasyon na tutol tayo sa hindi makatarungang pag-abuso sa kapangyarihan ng gobyerno. Ipaglaban ang malayang pamamahayag! Trabaho hindi paghihiganti!,” dagdag ni Montemar.
Sa panahon ngayon, isang institusyon na ang ABS-CBN na mataas ang credibilidad sa madlang tao lalu na sa paghahatid ng mga balita at serbisyo publiko. Hindi lang ito naghahatid ng mga balita at impormasyon kundi nasa scene of the action kapag may mga kalamidad at may mga kababayan tayong nangangailangan ng tulong at saklolo.
Kaya kung matapos ang maraming taon ay tuluyang magsasara ang network na ito, marami ang malulungkot kaya harinawang magbago ang takbo ng hihip ng hangin at hindi maputol ang operasyon ng ABS-CBN.
- Latest
