Chinese entry binawal na
KATAKUT-TAKOT na batikos ang inabot ni Presidente Duterte dahil hindi agad ipinagbawal ang pagpasok ng mga dayuhang Chinese sa bansa mula sa mga lugar sa China na malubhang apektado ng nCoV partikular sa lalawigan ng Wuhan na sinasabing pinagmulan ng karamdaman.
Bago nagdeklara ng ban ang pamahalaan, kinailangan pang kumpirmahin ng Department of Health ang unang kaso ng nCoV nang mapatunayan na ang isang babaeng Chinese na mula sa Wuhan province na siyang pinagsimulan ng karamdaman. Mahigit na umano sa isandaan katao sa China ang namamatay dahil sa karamdamang ito.
Binabatikos si Duterte dahil para raw binibigyan niya ng espesyal na pabor ang bansang China kaya kahit nagmula roon ang sakit ay hindi pinagbabawalan ang mga Tsino na makapasok sa Pilipinas. Kaya dahil dito, nagpatupad na ng pansamantalang ban ang pamahalaan sa pagpasok sa ating bansa ng mga Chinese mula sa mga apektadong lugar sa China.
Hindi naman talaga maituturing na insulto sa China pigilin man pansamantala ang pagpasok ng mga mamamayan nito sa Pilipinas dahil pinipigilan lang naman natin ang paglobo ng kaso ng mga taong dinarapuan ng karamdamang dulot ng Novel Coronavirus. Tiyak ko na nagpapatupad din ng ganitong hakbang ang ibang mga bansa sa daigdig dahil isa nang international risk ang naturang virus.
Idineklara na ang World Health Organization na ang karamdamang ito ay isang pandaigdig na panganib sa kalusugan. Sa tingin ko, ito’y maituturing nang isang pandemic na ang ibig sabihin ay mas malawak pa sa epidemiya.
Sa ngayon, marami pa ring nakapasok na Chinese nationals sa bansa na kinakitaan ng kahinahinalang sintomas ang under observation s a iba’t ibang ospital para alamin kung ang kanilang sakit ay dulot nga ng nCoV. Pero bakit ang tawag ng DOH sa kanila ay under investigation? Dapat under observation dahil hindi naman isang krimen ang pagkakasakit.
Bakit nga ba ngayon lang nagpasya ang Pangulo na pansamantalang pigilin ang pagpasok sa bansa ng mga Chinese? Well, sabi nga, better late than sorry.
- Latest