Power supply agreement ng Meralco, binabara sa ERC
Binabraso ng mga clean-energy adovocates “kuno” ang Energy Regulatory Commission (ERC) na ibasura ang mga power-supply agreements (PSAs) ng Manila Electric Company (MERALCO). Katuwiran ng clean-air environment at consumer groups na hindi environment-friendly ang mga ito.
Nagrali ang Power for People Coalition (P4P) sa tanggapan ng ERC. Iginigiit na: “ERC is acting as a floodgate that keeps another onslaught of dirty coal and fossil fuels upon Metro Manila power consumers at bay.” Mistulang “Nostradamus” si Gerry Arancesa na nangunguna sa grupo. Hinuhulaang mapapahamak ang mundo kapag inaprubahan ng ERC ang mga PSA ng Meralco.
Tingin ko, si Arances ay may layunin lang na manggulo. Kasi, hindi naman nagbibigay ng rekomendasyon para maresolba ang problemang inirereklamo nila. Tigilan na sana nila ang pagkukunwari na mahal nila ang kalikasan para sa kanilang personal agenda. Ang kailangan ng ating bansa ay masiguro ang malaki at sapat na kuryente, hindi ang panggugulo ng mga grupong ito.
Nagsusumikap ang gobyerno upang matapos ang mga bilyun-bilyong halaga ng proyekto para mabigyan ng mas maaliwalas na buhay ang ating mga mamamayan, at lalong maiangat ang ating bansa. Iginigiit ng militanteng grupo na ang mga coal plants ay naglalabas ng maruming usok. Nasolusyunan na iyan ng makabagong teknolohiya katulad ng mga High Efficiency Low Emission (HELE) at ng mga Ultra-Supercritical coal-fired power plants na ginagamit sa Taiwan at Japan.
Ang mga lumang planta na tumatakbo na ng higit sa 25 na taon ay ang siyang mga nakakapinsala sa ating kalikasan, hindi ang mga makabago at modernong mga planta. Isa pa, bakit Meralco lang ang pinag-iinitan gayung may mga ibang kumpanya pa gaya ng SMC, Aboitiz, Filinvest o Alsons na siyang nagpapatakbo ng mga planta sa iba’t-ibang lugar sa ating bansa?
Sino ba ang nakinabang nang gusto sa panahon ng dating administrasyon? Hindi ba ang crony ng mga Aquino na dating may ari ng Meralco na hanggang ngayon ay may mga negosyo pa rin ng power generation? Ang iba nga lang sa kanila eh ang mga source ay natural gas, at hindi coal.
- Latest