Naku po, huwag naman sana
MALAKI ang respeto ko kay Davao City Mayor Sara Duterte. Bukod sa nababasa at naririnig ko bilib ako sa kanyang pamumuno sa Davao. At sa tingin ko magkaiba ang opinion nilang mag ama dahil hindi lahat ng gusto ni President Digong ay sinusunod ni Sara, may sariling paninindigan lalo sa usapin ng pulitika. Nakapagtatag ng sariling partidong Hugpong ng Pagbabago na umaani ngayon ng malawak na popularidad.
Pero huwag sanang pag-isipan ang 2022 Presidential elections. Sara, hilaw ka pa! Ipaubaya muna ito sa mga pulitikong nakahawak ng matataas na puwesto sa gobyerno. Sa mga sipsip na nagsusulsol sa’yo mukhang lumaki ang ulo mo. Huwag kang padadala sa mga sulsulerong adviser mo dahil may dalang pambobola ang mga ‘yan. Marami pang pagkakataon, iwasan mong lumundag mula mayor sa pagiging President ng bansa. Huwag mong gayahin ang iyong ama na nagpadala sa sulsol ng kapartido noon kaya napilitang lumahok sa Presidential elections. Kunsabagay napagtagumpayan niya sa kabila ng kanyang style kanto boy.
Sang-ayon ako sa sinabi ni VP Leni Robredo na ang pagiging Presidente ng bansa ay “destiny” ng isang tao. Kaya para sa akin namnamin mo muna ang pagiging mayor ng Davao City. Walang puwedeng maipintas sa’yo bilang isang mayor. Unti-untiin mong ipakilala ang iyong sarili sa buong bansa upang sa ganung paraan ka makilala ng mga tao hindi ‘yung kilala ka sa pagiging anak ni Digong. Kailangan ka pa ng iyong mga kababayan sa Davao dahil madali kang lapitan, pro-poor ika nga.
Just keep your doing job well. Alam kong malakas ang iyong hatak sa tao pagdating ng oras ng pagdedesisyong tumakbo kang Presidente.
- Latest