Duterte drug war may humahanga rin
SA kabila ng pagtutol ng maraming bansa sa ipinatutupad na marahas na pakikibaka ng administrasyon laban sa droga, may Ilan ding humahanga at ibig pang tularan ito.
Kasama sa mga bansang ito ang Sri Lanka na isa sa maraming bansa na talamak ang problema sa ipinagbabawal na gamot. Nang makipagkita kay President Duterte ang Pangulo ng bansang ito, sinabi niya na gagawin niyang modelo ang war on drugs strategy ng Pilipinas.
Sa pangkalahatan, mahigpit na tumututol ang United Nations sa sistemang ito ng gobyerno kontra sa droga dahil lumalabag umano sa karapatang pantao. Ngunit para kay Sri Lankan President Maithripala Sirisena, ang Duterte approach laban sa droga ay dapat gawing modelo ng daigdig. Wow! Nahihinuha natin kung gaano kalubha ang problema sa droga at hindi na kayang resolbahin ng ordinaryong pagpapatupad ng batas. Kailangan nang mayroong mapatay upang ipakita ang ngipin at determinasyon ng pamahalaan na mapuksa nang tuluyan ang problema.
Kaso, nananatili ang paniniwala ng marami na pawang maliliit na isda lamang ang nadaramay sa giyerang ito na ang ibang napapatay ay mga inosenteng mamamayan who probably were in the wrong place at the wrong time.
Samantala, habang kabi-kabila ang mga napapatay sa maigting na giyerang ito, talamak pa rin ang pagpupuslit ng tone-toneladang shabu sa bansa. Diyan natin nakikita ang depekto ng sistema. Habang maraming napapatay na users at maliliit na pushers, mukhang hindi natitinag ang mga big time drug syndicates at tuloy pa rin ang pamamayagpag.
Ang masaklap, ang droga ay isang pandaigdig na suliranin na sumasaklot sa buong sangkatauhan. Ayaw man nating mangyari, may madadamay na inosenteng tao sa bakbakang ito. Sana man lang, pagsikapan pa ng mga awtoridad na tanging mga sangkot lang sa krimen ang madadamay sa kampanya.
- Latest