LIFE para sa mga magsasaka
KAPAG bagsak ang morale ng mga magsasaka dahil sa pinsala ng kalamidad, pati ang supply ng pagkain ay apektado. Dahil sa mga mapaminsalang bagyong dinanas natin, naapektuhan ang produksyon ng pagkain na isa sa mga maraming dahilan ng pagsirit ng pagtaas sa presyo ng bilihin.
Sa Ilocos Norte, may isinusulong na programa si Governor Imee Marcos na kung tagurian ay the right to Living Income for Farmers during Emergency o LIFE. Aniya, dapat igawad ng pamahalaan ang LIFE sa mga magsasaka na sinalanta ng kalamidad ang kanilang mga pananim para mabilis silang makabawi.
Ang konsepto ay bigyan ng trabaho ang mga apektadong farmers tulad ng pagkukumpuni ng mga nasirang dike, lansangan, tulay at ibang imprastruktura. Si Marcos ang kaisa-isang lokal na opisyal na kumakandidato para Senador sa darating na midterm elections sa Mayo.
Kaya habang nagsasagawa ng rehabilitasyon sa mga lugar na binagyo, ang mga magsasaka ay kasali sa pagbabangon ng kanilang lugar, at the same time, sinusuwelduhan sila ng pamahalaan. May pamilya nga namang dapat pakainin at itaguyod ang mga magsasaka. Ani Marcos, dapat ding bilisan ang pagpapalabas ng calamity funds ng mga pamahalaang lokal sa panahon ng mga kalamidad para tulungan ang mga magsasakang naapektuhan.
Umaabot sa P1.9 bilyon ang pinsala na dinulot ng bagyong Ompong sa agrikultura ng Ilocos Norte. Kaya kinakailangan ng pamahalaan ng Ilocos Norte na hingin ang tulong ng Department of Agriculture sa pamamagitan ng Quick Reaction Fund para tulungan ang mga magsasaka. Nagpatupad din ang Department of Social Welfare and Development ng cash-for-work program sa lalawigan.
- Latest