Diktadurya huwag na sanang maulit
GUGUNITAIN sa Setyembre 21 ang ika-46 na taon mula nang ideklara ni Presidente Marcos ang batas military sa bansa noong taong 1972. Kung tutuusin, kaunti na lamang sa mga kababayan natin ang nakakaalala sa mga pangyayari sa panahon ng martial law.
Importante ang komemorasyon para ipaalala sa bawat Pilipino na dapat magkaisa sa pangangalaga ng demokrasya at huwag nang pahintulutang mangyari muli ang madilim na kabanata ng ating bansa sa panahon ng martial law. Mukhang marami na ang nakalilimot sa pinagdaanan ng ating mga bansa sa mga panahong yaon.
Preparado na ang National Capital Regional Police Office at Manila Police District na magde-deploy ng 4,000 pulis sa Quirino Grandstand at iba pang panig sa Maynila. Ito ay upang siguruhin ang kaayusan ng iba’t ibang militante at relihiyosong grupo na nakatakdang magdaos ng rally kaugnay ng okasyong ito. Harinawang huwag magkaroon ng karahasan. Nakakabahala dahil hindi lamang mga militanteng grupo ang lalahok sa rally kundi pati ang mga Marcos loyalists. Huwag sanang magkabanggaan.
Nagkasundo umano ang pulisya at iba’t ibang grupo ng militante at relihiyoso para sa mapayapang rally. Inirekomenda ng MPD na ganapin ang aktibidad sa Quirino Grandstand habang sa Burnham green na lamang ang pro-Duterte group.
Ayon sa NCRPO, tanging ang mga may permit at organizer ang kanilang papayagang mag-rally. Huhulihin ang mga grupo na magsasagawa ng rally sa mga ipinagbabawal na lugar.
Tiniyak ng PNP na paiiralin ang maximum tolerance basta’t huwag lang humantong sa karahasan o pang-uudyok dahil kailangan pa rin nilang ipatupad ang batas at nararapat. Huwag naman sanang humantong pa sa ganoon.
- Latest
