Hindi titigil sa pagpatrulya
HINDI natatakot ang ating air force at navy sa banta ng China kapag nagpapatrulya sila sa karagatan. Kinumpirma ni AFP Chief of Staff Gen. Carlito Galvez noong Lunes na nagpapatuloy ang air force at navy sa pagpapatrulya kahit araw-araw silang binabantaan ng China. Tatlong beses sa isang araw ang patrulya ng Pilipinas. Hindi naman nagbigay ng komento si Galvez sa umano’y mas seryoso at mapanganib na banta sa atin, kumpara sa banta nila sa US.Siguro naiinsulto ang China na kahit maliit at mahina ang ating militar kumpara sa kanila, patuloy pa rin nating inaangkin ang teritoryong sinasabi nilang kanila.
Hindi rin sinabi ni Galvez kung saan nagpapatrulya ang ating militar sa karagatan. Marami tayong islang binabantayan sa Spratlys, kung saan may mga islang sakop na rin ng China. At dahil inaangkin nga ng China lahat, kahit may mga sundalo at sibilyan na sa ilang isla, nakukuha nilang magbanta sa mga lumilipad sa lugar. Ang Pag-asa island ay katabi ng ilang isla na hawak na ng China. Kung pinapatrulyahan natin ang lugar ng Pag-asa na hawak natin, bakit kailangang magbanta ng ganyan?
Hindi rin biro ang mga banta ng China, kahit sanay na ang air force at navy natin, o kung sino pa ang binabantaan ng China tulad ng Amerika. Baka dumating ang panahon ay may isa riyan na hindi na iniisip ang gagawin at magpabagsak na lang ng eroplano o magpalubog ng barko. Hindi ko maisip ang kahihinatnan o sakuna kung sakaling maganap ang hindi akalain. Ayon sa Palasyo, hindi titigil ang pagpapatrulya natin sa karagatan, at handang mamatay ang ating mga piloto para ipagtanggol ang soberenya. Huwag sanang umabot sa ganyan.
- Latest