Paghalili kay Sereno pangit ang hitsura

NAGKATOTOO ang babala ng mga pantas sa pagpa­patalsik ng Korte Suprema kay Chief Justice Maria Lour­des Sereno. Moralidad, hindi legalidad ang payo nila. Sinumang mahistrado ang bumoto sa pagpatalsik ay magmumukhang atat-na-atat makuha ang nabakanteng posisyon.

Bumoto sa pagpapatalsik ang walo sa kanila. Kabilang du’n ang tatlo sa limang pinaka-senior, kaya sa tradisyon ay otomatikong nominado bilang kapalit. Sila sina Teresita Leonardo de Castro, pangatlong pinaka-senior; Diosdado Peralta, pang-apat; at Lucas Bersamin, panglima. Isa sa maraming isyu laban kay Sereno ay kulang umano ito sa karanasan -- seniority -- bilang mahistrado.

Mas senior sa tatlo sina acting Chief Justice Antonio­ Carpio at Presbitero Velasco. Bumoto sila kontra sa pag­papatalsik, kaya hindi pangit tingnan na pumalit kay Sereno. Ganunpaman, bilang prinsipyo, tumanggi si Carpio sa oto­matikong nominasyon. Hindi makatarungan ang pagpa­patalsik, aniya, kaya ayaw niyang makinabang du’n. Pa­ngarap ninomang abogado na maging Chief Justice. Dalawang beses nang nanomina si Carpio, nang pinaka-senior siya nu’ng 2010 at 2012, pero na-bypass nang iniluklok ang dalawang mas bata. Pero ngayon tumanggi si Carpio dahil sa delikadesa. Nakiusap si retiradong Chief Justice Hilario Davide at ang Integrated Bar of the Philippines, na samahan ng lahat ng abogado, na tanggapin na niya ang puwesto. Hindi mabago ang paninindigan ni Carpio. Tumanggi rin si Velasco. Magreretiro na kasi siya ngayong Agosto sa edad 70.

Nu’ng una ayaw din tumanggap ng nominasyon ang natitirang tatlo. Sa Konstitusyon dapat punuan ng Presidente ang anumang bakante sa Korte Suprema sa loob ng tatlong buwan -- sa kaso ni Sereno sa Setyembre. Deadline na ng Judicial and Bar Council nu’ng Oktubre 26 sa pagnomina o aplikasyon sa bakanteng puwesto. Sinuman sa tatlong tumanggap, anuman ang idahilan, pangit pa rin ang dating. Sayang!