Drug tests sa estudyante
KUNG ako’y isang magulang na may anak pang nag-aaral, hindi ko tututulan ang sapilitang drug test sa mga pupils. Maaari itong ipatupad gaya ng drug test na requirement sa mga kumukuha ng drivers license. Ngunit kailangan ang isang bagong batas para maipailalim sa drug test ang mga bata.
Ang problema lang sa drug test, pinapasok ng anomalya sa dakong huli. May nababalitaan tayo na ang mga drug testing center na puwedeng suhulan para palabasing drug-free ang nagpapakuha ng test kahit hindi naman.
Ngunit kung sentido ang pag-uusapan, masasabi ko na basta maayos na maipatutupad, makabubuti ito sa pagtukoy ng mga kabataang nabibiktima ng droga upang sila’y maisalba sa masamang bisyo habang maaga pa.
May mga tumututol sa panukala ng Philippine Drug Enforcement Agency na isailalim ang mga estudyante mula sa Grade 4 pataas sa drug testing. Bawal kasi sa batas na ang mga batang nasa ganyang edad ay ipailalim sa drug test.
Katuwiran ng mga tutol, mato-trauma raw ang mga bata kapag pinaghihinalaang gumagamit sila ng droga. I disagree. Siguro mangyayari iyan kung pipiliin lang ang mga isasailalim sa test. Pero kung gagawing pangkalahatan, mabuti ito.
Ang pagkalulong sa droga kasi ay isang karamdaman na dapat matukoy at lunasan. Paano mo matutukoy kung wala ang ganyang pagsusuri.
Kung ako ang tatanungin, ipapayo ko pa siguro na gawing requirement sa enrolment ang pagbibigay ng specimen ng ihi ng kanilang mga anak para masuri. Puwedeng magtalaga ang Department of Health ng mga tauhang gagawa nito sa mga paaralan. Dagdag na budget ang kakailanganin pero kung sa kabutihan, bakit hindi naman tayo maglalaan ng pondo? Isang katotohanan na hindi mapapabulaanan na may mga paslit na gumagamit na ng droga.
- Latest