EDITORYAL – ‘Inidoro’ ang Manila Bay
KUNG ang Boracay ay inihalintulad ni Pres. Rodrigo Duterte sa poso-negro o “cesspool”, ang Manila Bay naman para sa isang environmentalist ay isang inidoro na hindi naipa-flushed. At maiimadyin kung ano ang itsura ng inidoro na hindi naipa-flushed ang dumi. Kakadiri! Kung ganito karumi ang Manila Bay, mas matindi pa pala ito kaysa Boracay.
Sabi ng environmentalist lawyer at Ramon Magsaysay awardee Ramon Oposa, masyado nang mataas ang bacterial levels sa Manila Bay. Mula sa 1 million MPN/100 ml ng fecal coliform, ngayon ay 5 million MPN/100 na ito mula pa 1999. Ang fecal coliform ay iba’t ibang uri ng bacteria na matatagpuan sa dumi ng tao at hayop.
Humarap sa pagdinig ng Senado si Oposa kaugnay sa rehabilitasyon ng Manila Bay noong Lunes. Ipinatawag si Oposa ni Sen. Cynthia Villar, committee chair ng Senate environment and natural resources. Si Oposa ang nag-file ng kaso sa Supreme Court para sa agarang paglilinis ng Manila Bay noong 1999 na noon ang level lamang ng coliform ay 1 million. Ang coliform level para sabihing safe na paliguan ang Manila Bay ay 200 MPN/100 ml.
Mabagal ang ruling ng SC sapagkat inabot ng isang dekada bago nagawang utusan ang 13 government agencies na linisin ang Manila Bay. Nagkabisa ang utos noong Disyembre 2008. Kabilang sa mga inatasang maglilinis sa Manila Bay ang Department of Environment and Natural Resources, Metro Manila Development Authority, Department of Interior and Local Government at iba. Pero hindi lahat ay tumalima sa kautusan.
Nabatid sa inquiry, na nabigo ang mga inatasang ahensiya ng pamahalaan na pigilan ang pagtatapon ng dumi sa Manila Bay. Napag-alaman na ang mga informal settlers o squatters sa Port of Manila ang nagtatapon ng dumi sa dagat. Ang mga dumi at basura nila ay deretso sa dagat. Ngayon, mas marami ang nagdudumi sapagkat kumapal ang squatters sa baybayin ng Manila Bay.
Malaking inidoro ang Manila Bay na hindi naipa-flushed. Kung patuloy na magiging inutil ang mga ahensiya ng pamahalaan at hindi makokontrol ang mga iresponsableng mamamayan sa pagtatapon ng dumi at basura, kahiya-hiya at kadiri-diri ang Maynila.
- Latest
