EDITORYAL - Dugang multa para sa abusado

Didto sa Subic, inig-abot sa usa ka sakyanan sa eskina, mohunong usa kini ug magpaabot og pipila ka segundos, usa ang driver molahos sa pagpadagan. Kadtong una nga moabot sa eskina, maoy una nga mopadayon sa pagpadagan. Resulta, hapsay kaayo ang trapiko didto bisan ug wala’y junction box nga gibutang sa ilang eskina.

Dinhi sa dakbayan sa Sugbo, dunay mga higayon nga kon walay traffic enforcer nga magbantay, magkayagaw ang mga sakyanan kay ang mga driver hilig kaayo og “paugat” nga abi kay “go” pa ang signal light, mopadayon sa pagpadagan ang driver bisan og wala na siya’y kalutsan didto sa unahan. Moresulta kini og grabeng trapik kay mababagan na man kadtong mga sakyanan nga gikan sa pikas eskina.

Tinguha karon ni Mayor Tomas Osmeña nga ipadoble ang kantidad sa multa niadtong mga motorista nga madakpan sa paglapas sa Junction Box Ordinance ingon man niadtong mga driver sa sakyanan nga mobabag sa pedestrian lane nga maoy agianan sa mga tawo nga molabang sa karsada. Pagka karon, P500 ra ang multa sa maong mga kalapasan.

Aw, kon doblehon ang kantidad sa multa, unya estrikto nga ipatuman sa mga traffic enforcers pinaagi sa pagdakop gyud sa mga abusadong driver, tingali mapanton sila og makaamgo na nga dili tukma ang ilang gibuhat. Daghang mga pedestrian nga kutob ra sa pagyawyaw kon ang ilang agianan, babagan na sa mga sakyanan.

Alang sa mga driver nga wala masayod sa lagda, dili gayud tukma nga mopadayon ka pagpadagan lapas sa pedestrian lane, sa dili ka pa mosulod sa Junction Box, kon makita nimo nga didto sa unahan dili pa makalusot ang imong sakyanan.

Dunay misugyot nga apilon pagtanggong bali’g usa ka buwan, ang sakyanan nga mobabag sa pedestrian lane ug sa Junction Box. Apan nahukman sa mayor nga igo na nga makapanton kanila ang pagdoble sa multa.