‘Sa mga VIP, gustong maging VIP at feeling VIP’
MAY mga tao sa lipunan pakiramdam nila sila ay entitled.
Palibhasa lapit sa nakaupong administrasyon o kung sinumang malalaking tao at personalidad feeling nila may “K” na silang mag-asam at magmayabang.
Ang titibay ng sikmura at lamanloob. Talagang ipinangangalandakan pa sa mga maliliit na tao ang kanilang pagiging sipsip o higop.
Dahil espesyal daw sila, nagde-demand ng galang at respeto. Pero sila hindi naman karespe-respeto at kagalang-galang.
Tulad nitong isang kulangot na si Sandra Cam. Umatungal sa NAIA kamakailan. Gusto niya mabigyan ng VIP treatment dahil siya raw ay high-risk individual.
Hindi yata naiintindihan ng talpulanang talunan sa pagka-senadora, ang respeto ay kinakamtan hindi ipinagkakaloob. Hindi ito namamana o transferable. Ang respeto ay progresibo.
Wala namang masama sa pagiging VIP at humihiling ng VIP treatment sa lansangan man o sa anumang mga tanggapan ng gobyerno o pribado.
Kung nakikita ng tao ang inyong identidad base sa inyong mga pinaggagawa at saysay sa lipunan, sila pa mismo ang lalapit sa inyo at mag-aalok ng mga prebilehiyo at serbisyo.
Kung ikaw ay malaking tao na, hindi na kailangang magmayabang pa, mag-name drop ng kung sinu-sino at mambastos ng mga maliliit na tao.
Simple lang, gusto mo ng respeto, respetuhin mo rin ang ibang tao.
You hear me, Sandra Cam?
Abangan ang BITAG Live araw-araw na sabay na napapanood at napapakinggan tuwing 10:00-11:00 ng umaga sa Radyo5 92.3 News FM at AksyonTV. Para sa iba pang palabas, mag-subscribe sa BITAG Official YouTube account.
- Latest