Kung buhay ka lamang
Kung ang mga lider nitong ating bansa
Ay tulad ni Rizal ang puso at diwa,
Itong bayan nati’y laging masagana
Pagka’t di iisip ng masamang gawa!
Itong si Ibarra at si Maria Clara
Dapat tularan ng nobyo at nobya;
Sa pagmamahalan sila’y naiiba
Pagka’t sa pag-ibig sila’y pambihira!
Kung ang kabataa’y tulad ni Elias
sa “Noli” at “Fili” bagama’t marahas
Laging nasa diwa kabutihang lahat
Itong ating bansa’y maligayang ganap!
Pilosopong Tasyo kung kaya nabantog
Ang kanyang isipan ay lubhang matayog;
Siya ang tanungan ng dukha at bantog
Sa mga problema ay laging may sagot!
Si Sisa ang naging simbolo ng lahi
Na sa bawat oras ay inaaglahi;
Marami ang Sisang sa ngayon ay sawi
Pagka’t napawalay sa asawa’t binhi!
May mga tao ring kapwa Pilipino
Na s’yang nang-aapi sa bawa’t segundo;
Nangyari kay Crispin saka kay Basilio
Pawang kasalanan ng kalahi nito!
Kaya Dr. Rizal kung buhay ka lamang
Tiyak na masaya itong bayan;
Ikaw yaong sulo na siyang tatanglaw
Sa magulong diwa nitong sambayanan!
- Latest