Bagong PWD, Senior Citizen ID inilunsad ng Valenzuela LGU

Laban sa pekeng IDs

MANILA, Philippines — Upang matigil na ang talamak na bentahan at paggamit ng pekeng Persons with Disabilities at Senior Citizens ID, naglunsad ang Valenzuela City government ng makabagong ID na may holographic seal at tampered resistant tool.

Sa paglulunsad ng bagong disenyo ng PWD at Senior Citizens ID, ipinaliwanag ni Mayor Wes Gatchalian kailangan nang baguhin ang mga ID matapos na ilang kaso ng bentahan ng mga ID online ang  naitala.

Nakakalungkot lamang na sangkot mismo sa paggamit ng mga pekeng  PWD at Senior Citizens ID ay mga residente mismo ng lungsod. Nakakulong at sinampahan na ng kaso ang mga ito.

Sinabi ni Gatchalian na marami na silang natatanggap na  reklamo mula iba’t ibang establisimyento hinggil sa paggamit ng mga  PWD at Senior  Citizen ID upang makakakuha ng  20% discount.

Ayon naman kay Valenzuela City Police Station Patrol Operation Section chief, PMaj. Jesus Mansibang,  huli sa entrapment ang isang babae na nagbebenta ng  pekeng ID online kaya katuwang din nila sa operasyon ang  Anti Cyber Crime Unit. Nakuha dito ang walong pekeng PWD IDs at  dalawang  driver’s license.

Bunsod nito, sinabi naman ni 1st District  Councilor Atty. Bimbo dela Cruz,  gumawa sila ng ordinansa na nagbibigay ng awtorisasyon sa lahat ng mga establisimyento na kumpiskahin ang  mga pekeng ID.

Sa ilalim ng ordinansa,  sinumang  indibiduwal ang mahuhulihan ng  pekeng ID ay papatawan ng P5,000 multa sa unang  pagkakataon, P10,000 sa ikalawa at P15,000 sa ikatlong paglabag habang P10,000 multa sa unang paglabag,P20,000 sa ikalawang paglabag at P30,000 sa ikatlong paglabag sa mga establisi­myento na hindi ma­ngungumpiska ng mga pekeng  ID.

Sa record ng Valenzuela LGU may 212 ang  drugstrore o pharmacy, 67 ang restaurant/refreshment parlor at 102  supermarket/convenience store.