Multi storey apartment type sa Tugatog Cemetery 50% tapos

MANILA, Philippines — Inihayag ng Malabon City LGU na nasa 50%  nang tapos ang multi storey apartment sa  Tugatog Public Cemetery na layon ng city government na mabigyan ng maayos  na huling hantungan ang mga mahal sa buhay ng mga Malabuenos.

“Katulad po ng ipinangako ko noon, sisiguraduhin natin na ang hu­ling hantungan ng ating mga yumaong mahal sa buhay ay maayos, may dignidad, at may respeto. Hindi man po pormal na nai-turnover sa atin ang proyektong ito sa ating administrasyon noong mga unang araw ng ating panunungkulan, ay atin itong tututukan,” Malabon  City Mayor Jeannie Sandoval.

Ayon kay Sandoval, titiyakin ng city government na mabigyan ng maayos na libingan ang mga namayapa na pagbibigay respeto ng kanilang mga pamilya.

Patuloy aniya ang kanilang pagpapatayo ng apartment type building para sa kapanatagan ng mga pamilyang mayroong mahal sa buhay na nakahimlay sa nabanggit na sementeryo.

Nabatid na patuloy ang pag iinspeksiyon ng  City Engineering Department upang masiguro na maayos at matibay ang multi storey apartment kung saan siniguro na buhos  ang mga semento, maayos ang paglalagay ng  hollow blocks at hindi substandard ang mga bakal  na ginamit.

May sukat na 908 square meters ang floor area at mayroong 360 nitso sa ground floor habang 288 naman sa 2nd  floor.

“Kapayapaan ng ­ating mga puso at ng kaluluwa ng ating mga yumaong mahal sa buhay ang ­ating isinasaalang-alang sa pagpapatuloy ng pagsasaayos ng Tugatog Public Cemetery. At sa pagsasagawa ng apartment-type building na ito, makasisiguro ang bawat Malabuenos na magkakaroon ng maayos na himlayan ang mga sumakabilang buhay nilang mga kaanak. Ipagpapatuloy natin ang pagsasagawa ng mga programa para sa ikagaganda at ikaaayos ng libingan,” binigyan diin naman ni City Administrator Dr. Alexander Rosete.

Matatandaang  ipinagawa ni  Sandoval  ang Wall of Remembrance noong 2023 sa Tugatog Public Cemetery upang mabigyan ng pagkakataon at pag-alala ang mga namayapa ng mahal sa buhay.