Partylist nominee patay sa ambush
MANILA, Philippines — Patay ang 2nd nominee ng Ang Bumbero Partylist matapos na pagbabarilin ng riding in tandem sa harapan ng kanyang bahay sa Sampaloc, Maynila kagabi.
Idineklarang dead on arrival sa UST Hospital ang biktimang si Leninsky Bacud, dating chairman at second nominee ng Ang Bumbero Party-list na tumatakbo sa May 12 party-list polls.
Batay sa sketchy report ng Homicide Section ng Manila Police District (MPD), nabatid na bago mag-alas-6:00 ng gabi nang maganap ang krimen sa harapan ng bahay ng biktima sa P. Guevarra St., sa Sampaloc, Manila.
Nauna rito, magkasama pa umano sina Bacud at si Jose Antonio Goitia sa isang aktibidad ngunit naghiwalay din dahil pauwi na ang biktima sa tahanan nito. Laking gulat na lang umano ni Goitia nang mabalitaang tinambangan na ang biktima.
Sinasabing kadarating lamang ni Bacud sa lugar at kabababa ng kanyang sasakyan nang pagbabarilin ng mga salarin.
Nabatid na isang pulis sa lugar ang nagawa pang rumesponde sa ambush at nakipagbarilan sa mga suspek ngunit nakatakas pa rin ang mga ito, lulan ng isang motorsiklo.
Ayon kay PMaj. Philipp Ines, tagapagsalita ng MPD, habang isinusulat ang balitang ito ay kasalukuyan pa silang nagsasagawa ng hot pursuit operation.
Masusi na rin umano nilang iniimbestigahan ang krimen upang matukoy kung sino ang nasa likod nito, gayundin ay kung may kinalaman ito sa nalalapit na halalan.
- Latest
