4 biktima ng trafficking sa Cambodia balik Pinas na

MANILA, Philippines — Inihayag ni Immigration Commissioner Joel Anthony Viado na nakabalik na sa Pilipinas ang  apat na biktima ng human trafficking matapos na ma-rescue mula sa online scam na trabahaho sa Cambodia.

Ang mga biktima na nasa edad 20 at 30 ay dumating sa Ninoy Aquino International Airport Terminal 1 noong Abril 19 sakay ng Philippine Airlines flight mula Phnom Penh. 

Ang kanilang ligtas na pagbabalik ay pinangasiwaan ng Philippine Embassy sa Cambodia at ng Inter-Agency Council Against Trafficking (IACAT).

Ang mga biktima ay na-recruit matapos maakit ng makita sa Facebook job ads na nangangako ng mataas na suweldong trabaho bilang mga encoder at customer service staff.

Sa kanilang pagda­ting sa ibang bansa, kinumpiska ang kanilang mga pasaporte at napilitan silang magtrabaho sa mga online na operasyon ng pandaraya—nagpapanggap bilang mga ahente ng FBI o mga romantikong kasosyo sa mga platform ng pakiki­pag-date para manloko ng mga dayuhan.

Ngunit nang ma­bigong maabot ang mga target, pinarusahan, pinahirapan ang mga biktima at kalaunan  ay ibinenta o “inilipat” sa ibang mga sindikato na parang mga kalakal.