7 pulis Parañaque pinaaaresto
Chinese trader kinotongan
MANILA, Philippines — Pitong pulis kabilang ang dalawang opisyal ng Sto. Niño Police Substation 3 ng Parañaque Police Station ang ipinaaaresto ng National Capital Region Police Office (NCRPO) matapos isumbong ng isang dayuhang negosyante ng pangingikil ng P100,000 para i-release ang kaniyang sasakyan, noong Huwebes ng gabi.
Ang akusasyon ng 25-anyos na negosyanteng Chinese national, sa pamamagitan ng isang interpreter, ay idinulog sa Parañaque Police headquarters at agad inaksiyunan ni NCRPO chief PBGen. Anthony Aberin.
Lumalabas na nangyari ang insidente sa Macapagal Boulevard dakong alas-7:30 ng gabi ng Abril 24, 2025. Pinara ng mga pulis ang sasakyan ng complainant sa itinayong checkpoint, at nang hanapan ng dokumento ay sinabihan umano siyang peke ang ipinakita at siya ay dinala sa presinto.
Sa pagnanais na mailabas sa kustodiya ng mga pulis ang sasakyan, pumayag ang complainant na magbigay ng P100,000 mula unang napagkasunduan na P300, 000.
Ayon kay Aberin, bukod sa kasong administratibo na may maximum penalty na ma-dismiss sa serbisyo, isinailalim na ang pito sa inquest proceedings sa Parañaque City Prosecutor’s Office para sa kasong robbery/extortion.
- Latest
