Isko nangunguna sa pagka-alkalde ng Maynila - Tangere survey

MANILA, Philippines — Nangunguna pa rin si dating Manila Mayor Francisco “Isko Moreno” Domagoso sa karera para sa pagka-alkalde ng Maynila sa nalalapit na 2025 midterm elections.

Nabatid na nakakuha si Isko ng 51% na suporta mula sa mga botante, habang si kasalukuyang Mayor Honey Lacuna ay nasa ikalawang puwesto na may 37% at sinundan ni Sam Versoza ng Tutok to Win Party-list na may 10%. Ang iba pang kandidato ay may kabuuang 1%, at 1% lamang ang undecided.

Nananatiling malakas ang suporta para kay Isko ng Distrito 1, 2, 4, at 6, lalo na sa mga kabataang edad 18-39. Si Lacuna naman ang mas pinipili sa mga Distrito 3 at 5, at ng mga edad 40 pataas. Si Versoza ay nakapuntos ng mataas sa Distrito 5.

Sa karera para sa Bise Alkalde, nangunguna si Chi Atienza, ka-tandem ni Isko, na may 56% na suporta. Si Vice Mayor Yul Servo ay may 37%. Mas mababa sa 1% ang boto para sa ibang kandidato, habang 6% ng botante ay undecided pa.

Samantala, karamihan sa mga botante ay naniniwalang dapat tutukan ng mga kandidato ang serbisyong pangkalusugan, pagbaba ng presyo ng bilihin, pagtaas ng sahod, at imprastraktura para sa paaralan at ospital.

Nasa 41% ng mga residente ang nagsabing mas maganda kaysa karaniwan ang kanilang pamumuhay, 45% ang nagsabing karaniwan lamang, at 14% ang nagsabing mahirap.

Ang survey ay isinagawa ng Tangere noong Abril 19–20 gamit ang hybrid na paraan—pinagsamang online (Tangere app) at face-to-face. May kabuuang 1,500 respondents ang lumahok, gamit ang random at probability sampling methods.