70-taong gulang na retiradong OFW, nanalo ng P500,000 Jackpot sa Go for Gold 50s

MANILA, Philippines — Isang 70-taong gulang na retiradong overseas Filipino worker (OFW) mula sa Fairview, Quezon City, ang nanalo ng P500,000 jackpot sa Go for Gold 50s game. Si Benjamin Gacutan, na matagal nang naglalaro ng scratch cards, ay hindi inaasahan na ang isang simpleng pagbisita sa Lotto outlet ay magbabago ng kanyang buhay.

Si Benjamin, na nagretiro mula sa trabaho sa Riyadh, Saudi Arabia noong 2019, ay nagsabing wala siyang partikular na plano nang pumasok siya sa Lotto outlet sa SM Fairview.

“Wala akong plano na bumili ng scratch card dito, pero dinala lang ako ng mga paa ko sa outlet na ito. Scratch lang ako ng scratch tulad ng dati,” kuwento ni Gacutan.

Bagama’t madalas na siyang manalo ng mga maliliit na halaga tulad ng P5,000 noong Nobyembre 2024, hindi niya inisip na makakamtan niya ang jackpot na P500,000.

Nang simulan niyang i-scratch ang kanyang biniling card, nagulat siya sa nakita. “Akala ko P50 lang, pero nung nakita ko na P500,000 na, hindi ako makapaniwala,” ani Benjamin. Pati ang teller na unang naka-check ng kanyang panalo ay hindi rin makapaniwala sa laki ng napanalunan niya.

Hindi nag-aksaya ng oras si Gacutan. Kasama ang kanyang kapatid na babae, agad nilang pinuntahan ang PCSO office upang i-claim ang premyo. “Sinabi agad ng kapatid ko na dumaan na kami sa PCSO,” dagdag niya.

Para kay Gacutan, hindi lang pera ang mahalaga sa kanyang panalo, kundi ang pagkakataon na matulungan ang kanyang pamilya.

“Ako yung breadwinner sa pamilya, kaya ang pinakamagandang pakiramdam ay ang makapag-share sa kanila ng biyaya,” wika niya.

Ang napanalunan niyang P500,000 ay ilalaan niya para sa mga gastusin sa kalusugan at medical maintenance, pati na rin para sa isang bakasyon ng pamilya.

“Gagamitin ko rin yung iba para sa kalusugan ko, kasi matanda na ako,” dagdag niya. Palibhasa’y masaya siya sa suporta ng kanyang pamilya, nais niyang ibahagi ang kanyang tagumpay sa kanila.

“Pag nanalo ako, binabahagi ko sa pamilya ko. Sila kasi yung laging nandiyan para sa akin,” ani Gacutan.

Bagamat nagpapasalamat sa magandang pagkakataon, ipinaalala ni Gacutan sa iba na ang mga laro ng suwerte tulad ng Scratchit at Go for Gold ay dapat ituring bilang libangan, hindi bilang paraan ng pagpapayaman.

“Wag mong aasahang laging mananalo. Dapat extra money lang ang ginagamit, hindi yung perang pang-araw-araw ng pamilya,” paalala niya.

Sa pagtanda, nakikita ni Gacutan ang halaga ng pagtulong sa iba at ang pagiging bukas sa mga biyaya ng buhay. “Mas mabuti pang mag-try kaysa hindi, pero dapat responsible pa rin sa pera,” ani Gacutan.

Sa hinaharap, nais ni Gacutan na patuloy na mag-enjoy sa buhay at magbigay ng suporta sa kanyang pamilya. Plano rin niyang tulungan ang kanyang pinsan, isang pari na magtayo ng simbahan.

Si Benjamin Gacutan ay isang patunay na ang suwerte, at pagpapahalaga sa pamilya ay maaaring magdala ng magagandang bagay sa buhay. Ipinapakita ng kanyang kuwento na kahit sa retirement, may mga pagkakataon pa ring magbigay ng biyaya at tulong sa mga mahal sa buhay.

Editor's Note: This press release for Scratch It is not covered by Philstar.com's editorial guidelines.