3 biyahero nameke ng dokumento hinarang sa NAIA

MANILA, Philippines — Pinigil ng mga tauhan ng Bureau of Immigration (BI) sa Ninoy Aquino International Airport (NAIA) Terminal 3 ang dalawang indibidwal na nagpapanggap na magkatrabaho at magbabakasyon sa ibang bansa gamit ang pekeng dokumento.

Sa ulat ng Immigration Protection and Border Enforcement Section (I-PROBES) ng BI na dalawang babae, may edad na 25 at 31, ang nagtangkang umalis ng bansa patu­ngong Bangkok, Thailand. Kapwa sinabi ng mga ito na sila ay nagtatrabaho bilang mga call center agent para sa isang BPO sa Quezon City at bibiyahe bilang turista.

Gayunpaman, sa pagpapakita ng kanilang mga dokumento, napansin ng mga opisyal ang mga hindi pagkakapare-pareho na sumasalungat sa kanilang mga unang pahayag.

Subalit inamin ng da­lawang dinakip na hindi talaga sila magkaopisina, at sa halip ay na-recruit para magtrabaho sa Laos, kung saan kukuha sila ng mga posisyon sa customer service representative (CSR) at nangako ng P50,000 na suweldo kada buwan.

Inamin nilang nagbayad sila ng P3,000 sa isang fixer na nakilala nila sa social media para maglabas ng mga dokumento para magmukhang officemates sila.

Binalaan ni BI Commissioner Joel Anthony Viado ang publiko tungkol sa mga scam hub sa mga bansa sa Asya, na nagta-target sa mga Pilipino na magtrabaho bilang mga CSR. Ang mga sindikatong ito ay umaakit sa mga biktima ng mga pangako ng mataas na suweldong mga trabaho sa call center, para lamang silang mapilitan sa mga mapanlinlang na aktibidad, tulad ng mga online scam at pandaraya sa cryptocurrency, sa ilalim ng malupit at mapang-abusong mga kondisyon sa pagtatrabaho.