Rider sumalpok sa pick-up tigok

MANILA, Philippines — Isang rider ang binawian ng buhay matapos na mawalan ng kontrol at sumalpok ang kanyang minamanehong motorsiklo at sa isang pick-up sa Tanay, Rizal kamakalawa.

Dead-on-arrival sa Antipolo City Hospital System ang biktimang si alyas Albert, 22, lock smith, at residente ng Brgy. Mauway, Mandaluyong City dahil sa matinding pinsala sa ulo at katawan habang sugatan naman ang kanyang angkas na hindi agad nakuha ang pagkakakilanlan.

Lumilitaw sa ulat ng Tanay Municipal Police Station na dakong alas-12:00 ng tanghali nang maganap ang insidente sa Marilaque Highway, sa Brgy. Cuyambay, sa Tanay.

Nauna rito, binabagtas ng biktima ang Marilaque Highway patungong Brgy. Sampaloc sa Tanay nang pagsapit sa naturang lugar na tinaguriang ‘Devil’s Corner,’ ay bigla na lang nawalan ng kontrol ang rider sa motorsiklo.

Sanhi nito, sumemplang ang motorsiklo at bumangga sa kasalubong na pick-up na minamaneho naman ng isang alyas ‘Chris,’ 48, self-employed at residente ng Teresa, Rizal.