Langis ng truck, tumagas: 3 motorsiklo, sumemplang sa EDSA
MANILA, Philippines — Tatlong motorsiklo ang sumemplang sa bahagi ng EDSA-Santolan sa Quezon City, kamakalawa ng gabi dahil sa tumagas ang langis mula sa isang 10-wheeler truck.
Nabatid na patungo sana ang truck sa Camp Aguinaldo Gate 6 upang maghatid ng mga sako ng puting buhangin pasado alas-11:00 ng gabi nang maganap ang insidente sa southbound lane ng EDSA-Santolan.
Gayunman, pagdating nito sa kanto ng Boni Serrano Avenue ay pumutok umano ang power steering ng truck kaya tumagas ang tinatayang nasa dalawang litro ng langis sa kalsada.
Dahil dito, nasa tatlong motorsiklo ang sumemplang matapos na madulas dahil sa langis.
Ayon sa mga tauhan ng Metro Manila Development Authority (MMDA), na rumesponde sa insidente, maayos naman ang mga rider ngunit isa sa mga kanila ang nagtamo ng sugat sa tuhod.
Pansamantala namang isinara ng mga awtoridad ang isang lane ng kalsada sa mga motorista dahil sa pangyayari at saka tinambakan ng kusot ang langis upang matanggal ito.
Sa salaysay naman ng driver ng truck na si AR Samson, maayos naman ang behikulo nang inspeksyunin niya bago sila bumiyahe mula Porac, Pampanga.
Gayunman, nang magpreno siya at tumigil ay bigla na lang umanong bumagsak ang steering box at dito na aniya tumulo ang langis.
“Yun ang nangyari. ‘Di mo pwedeng hindi itsi-check sa haba ng tinatakbo ng truck eh. Talagang bumagsak lang talaga siya kasi ginagamit,” ayon sa driver.
- Latest