2 bebot na recruit ng sindikato ng human trafficking, napigil ng BI
MANILA, Philippines — Pinagpapanggap na rin na mga seaman ng sindikato ng human trafficking maging mga babae nilang biktima makaraang dalawa ang maharang at masagip ng Bureau of Immigration sa Clark International Airport sa Pampanga kamakailan.
Sa ulat ng BI-Travel Control and Enforcement Unit, nasabat nila ang dalawang babaeng biktima noong Mayo 24 habang nagtatangkang umalis ng bansa patungo sa Bangkok.
Unang nagpanggap ang dalawang babae na ‘sea-based Overseas Filipino workers (OFWs)’ na na-recruit para magtrabaho sa Thailand. Nagpakita sila ng mga kahina-hinalang dokumento na hindi nakalusot sa pagsusuri ng immigration officers.
Nang dumaan sa masusing pagtatanong, inamin ng dalawa na ang pinal nilang destinasyon ay ang Laos kung saan magtatrabaho umano sila bilang mga call center agents.
Kabilang ang Laos, kasama ang mga bansang Cambodia at Myanmar sa tinukoy ng BI na pinagdadalhan ng mga sindikato ng call scams sa kanilang mga biktima.
“The modus operandi here is for the victims to initially fly to Thailand where they would then board their connecting flight to Laos,” saad ni Tansingco.
Inamin ng dalawa na na-recruit sila sa pamamagitan ng isang recruitment advertisement na nakita nila sa social media. Nagbayad umano sila ng tig-P40,000 sa kanilang mga handlers kapalit ng pagproseso ng kanilang mga pekeng travel documents.
- Latest