Mag-ina, patay sa sunog: Arson sinisilip
MANILA, Philippines — Patay ang isang mag-ina matapos ma-trapped sa nasusunog nilang kuwarto sa insidente ng hinihinalang arson sa Quezon City, kahapon.
Tumanggi pa muna ang Bureau of Fire Protection (BFP) na pangalanan ang mga biktima na ang ina ay inilarawang nasa 40-anyos ang edad, habang 17 hanggang 18-anyos ang kanyang anak na babae, dahil wala pa umanong clearance ang pamilya ng mga ito.
Batay sa ulat ng BFP, pasado alas-2:00 ng hapon nang maganap ang sunog sa dalawang palapag na tahanan na matatagpuan sa 13-2 Avelino Alley Lt. J. Francisco, Brgy. Krus na Ligas, Quezon City.
Umabot lamang ng unang alarma ang sunog bago tuluyang naapula bago mag-alas-2:58 ng madaling araw.
Pero tumambad sa mga responder ang wala nang buhay na mag-ina sa loob ng kanilang kuwarto, kung saan may anim na buwan pa lamang umano silang nangungupahan.
Inaalam pa ng BFP ang sanhi ng apoy, ngunit kabilang sa iniimbestigahan nila ay posibleng arson o sinadya ang sunog.
“Kakaiba po ang sunog na ito, iisang kuwarto po siya at merong commotion ... nandun ‘yung bata, sinasabing nagsisigaw ng tulong at hindi mabuksan kasi naka-lock po. At later on, siguro mga ilang minuto, nandun na nga, bigla na lang nagkaroon ng apoy at nagkaroon ng sunog doon,” ayon kay Fire Sr. Supt. Aristotle Bañaga.
Sa pagtaya ng pulisya, aabot lamang sa P24,000 ang halaga ng mga ari-arian na natupok sa sunog at ang silid lamang ng mga biktima ang naapektuhan nito.
- Latest