Dismissal ng pulis na dawit sa P6.7 bilyong shabu, ipinagpaliban
MANILA, Philippines — Inihayag ni Philippine National Police (PNP) chief Gen. Rodolfo Azurin, Jr. na pansamantalang ipagpapaliban ang rekomendasyon ng Internal Affairs Service (IAS) na sibakin sa serbisyo si Master Sgt. Rodolfo Mayo, Jr. na miyembro ng PPNP Drug Enforcement Group na nakuhanan ng P6.7 bilyong halaga ng shabu sa Maynila noong nakaraang taon.
Ayon kay Azurin, pinarerebisa niyang mabuti ang kaso, anggulo, proseso at documentation upang matiyak na walang ‘loopholes’ at hindi mababasura dahil lamang sa technicality.
Sinabi ni Azurin na inatasan niya ang Discipline, Law and Order Division (DLOD) ng Directorate for Investigation and Detection Management(DIDM) sa pangunguna ni Maj. Gen. Eli Cruz na siguraduhing hindi mababago o mababaligtad ang rekomendasyon ng IAS na sibakin na sa serbisyo si Mayo.
Giit ni Azurin, hindi na dapat pang makabalik si Mayo sa serbisyo dahil sa teknikalidad at kawalan ng due process.
Samantala, wala namang nakikitang dahilan si Azurin upang tanggalin sa puwesto bilang hepe ng PNP Drug Enforcement Group si chief Brig. Gen. Narciso Domingo matapos na maaresto si Mayo.
Paliwanag ni Azurin, mismong ang PDEG ang umaresto kay Mayo sa isinagawang buy-bust sa kanyang lending office sa Maynila noong Oktubre 8, 2022.
Naniniwala si Abalos na may mataas na opisyal ng PNP ang umano’y nagpoprotekta sa mga pulis upang pumasok sa kalakaran ng ilegal na droga.
- Latest
