Cellphones, laptops nadiskubre sa immigration jail
MANILA, Philippines — Nakumpiska ng mga tauhan ng National Capital Region Police Office (NCRPO) at Bureau of Immigration (BI) ang sari-saring “communication devices” sa loob ng Immigration Warden Facility sa Taguig City kung saan nakaditine ang mga dayuhan na nadakip sa ibat-ibang krimen at mga paglabag.
Ito ay makaraan na magkasa ng “Oplan Greyhound” ang BI at NCRPO sa naturang pasilidad na nasa loob ng Camp Bagong Diwa, Bicutan, dakong alas-2 ng madaling araw kahapon.
Nakumpiska ang ilang piraso ng mobile phones, laptop computers, internet routers at mga cors, mga sigarilyo at tinatayang P500,000 halaga ng cash na pawang ipinagbabawal.
kinasa ang operasyon makaraan ang impormasyon na nagagawang makapag-utos sa kaniyang mga tauhan sa sindikato ang naarestong lider ng isang Japanese robbery gang na si alyas “Luffy” sa kabila na nakakulong siya sa BI Warden Facility at naghihintay ng utos sa kaniyang deportasyon.
Nakatakda rin na magkasa ang sorpresang drug test sa mga tauhan ng BI Detention Facility ang NCRPO.
Sinabi ni NCRPO Director PMGen Jonnel Estomo na isinagawa ang operasyon para mapataas ang antas ng seguridad at kaayusan sa pasilidad para sa mga dayuhang nakaditine, mga bisita at mga tauhan nito.
- Latest