Pick-up girl, pinatay ng kostumer sa motel
‘Di nagkasundo sa bayad
MANILA, Philippines — Patay ang isang 23-anyos na umano’y ‘pick-up’ nang pagsasaksakin ng kaniyang kostumer na lalaki makaraang magtalo umano sa bayad para sa panandaliang aliw na inialok ng biktima, kamakalawa ng gabi sa loob ng isang motel sa Sta. Cruz, Maynila.
Nadakip ng mga pulis ang suspek na nakilalang si Naif Imam, 19, vendor, ng Elizondo Street, Brgy. 308, Quiapo, Maynila.
Kinilala naman ang biktima na si alyas “Malou”.
Sa ulat ng Manila Police District-Homicide Section, dakong alas-3:25 ng madaling araw nang iulat sa kanila ang pagkakatagpo ng isang patay na babae sa loob ng Aristotle Motel sa may Rizal Avenue, Sta. Cruz.
Sa inisyal na imbestigasyon, sinabi ng isa sa roomboy na dakong alas-2:15 ng madaling araw nang marinig niya mula sa labas ng Room 314 na nagmamakaawa ang babae.
Dito niya agad na isinumbong ito sa barangay na siya namang humingi ng tulong sa pulisya.
Sa inisyal na pagsisiyasat, nauna umanong nagkasundo ang biktima at suspek sa halagang P400 para sa pagtatalik.
Nang nasa loob na ng kuwarto, nanghingi ng dagdag na P200 ang biktima na ikinagalit ng suspek at nagresulta sa pananaksak sa babae gamit ang may 12 pulgadang patalim.
Sinampahan na ng kasong Rape with Homicide sa Manila City Prosecutor’s Office ang suspek.
- Latest