Pasahero nag-bomb joke , hinuli, pinababa ng eroplano
MANILA, Philippines — Hinuli at pinababa ng eroplano ang isang matandang babae na nagbirong may dalang pampasabog.
Ito’y matapos na humingi ng security assistance ang crew attendants ng Cebu Pacific flight 5J97 na pupunta sa Davao patungong Manila kamakalawa ng hapon.
Sa ulat ng Davao International Airport security, kinilala ang pasahero na isang Annabelle C. Macose, 59, at residente ng Pangasinan.
Ayon sa ulat, pinuntahan at sumakay sa eroplano ang mga tauhan ng PNP Aviation Security Group (PNP-AVSEU) na may kasamang ilang airline agent para i-offload at arestuhin ang suspek na pagkatapos ay isinailalim sa imbestigasyon at kalaunan ay itinurn-over sa Sasa Police Station para sa custodial proceedings.
Ang iba pa sa mga pasahero ay pinaalis sa eroplano at ang sasakyang panghimpapawid ay inilagay sa isang itinalagang isolation bay para ang lahat ng naka-check-in na bagahe at mga hand-carried bags ay muling ma-screen bilang bahagi ng protocol ng seguridad.
Matapos matiyak ang kaligtasan ng sasakyang panghimpapawid, ang flight ay tumuloy sa destinasyon nito at umalis sa paliparan sa 09:11 PM ng parehong araw. May 221 pasahero ang sakay ng eroplano.
- Latest