P500K pabuya alok ni Abalos sa Percy Lapid slay
MANILA, Philippines — Nag-alok si Department of the Interior and Local Government (DILG) Secretary Benjamin ‘Benhur’ Abalos Jr. ng P500,000 pabuya para sa sinumang makapagbibigay ng impormasyon na magreresulta sa pagkakaaresto sa mga taong nasa likod ng pagpatay sa beteranong radio commentator na si Percival ‘Percy Lapid’ Mabasa.
Ginawa ito ni Abalos nang dumalaw sa burol ni Lapid sa Manila Memorial Park sa Parañaque City nitong Miyerkules ng gabi.
Nilinaw naman ni Abalos na ang naturang cash reward ay galing sa sarili niyang bulsa at hindi magmumula sa pondo ng DILG.
“I am offering P500,000 from my own money, for any information na makakatulong pa sa imbestigasyon,” ayon kay Abalos.
Tiniyak din niya sa pamilya ni Lapid na gagawin ng pamahalaan ang lahat upang matukoy at mapanagot sa batas ang mga taong may kagagawan ng krimen.
Masusi na aniyang nagsasagawa ng imbestigasyon ang Philippine National Police (PNP) at lahat ng anggulo sa kaso ay kanilang binubusisi.
Sa inisyal na pagsisiyasat, lumilitaw na talagang planado ang pagpatay at malaki ang hinala ng mga awtoridad na may kinalaman ito sa trabaho ni Lapid.
Matatandaang naganap ang krimen dakong alas-8:30 ng gabi noong Lunes sa gate ng BF Resort, na matatagpuan sa Aria St., Brgy. Talon 2, Las Piñas City.
Samantala, labis namang nagpapasalamat ang pamilya ng biktima sa ginawa ni Abalos.
“Maganda rin ‘yung magbibigay sila ng pabuya, because that will help to hasten the processes of investigation,” ani Roy Mabasa, kapatid ni Lapid.
- Latest