2 patay sa pamamaril sa Forbes Park
MANILA, Philippines — Dalawa ang nasawi sa naganap na pamamaril ng isang family driver na hinihinalang lango sa alak sa loob ng Forbes Park sa Makati City, Lunes ng gabi.
Inisyal na kinilala ng Makati City Police Station ang mga nasawi na sina Jay-Ar Tomenio, isang family security at si Eugene Sitjar, isa ring family driver.
Naaresto sa follow-up operation ang suspek na si Julius Cortez,.
Narekober sa kaniya ang isang kalibre .40 baril na may dalawang magazine at 15 bala.
Sa ulat ng pulisya, naganap ang insidente sa loob ng isang bahay sa Narra Street, South Forbes Park Village, sa naturang siyudad.
Ayon sa mga saksi na sina Bernard Saquing, isang kasambahay at Jomar Sol, security, lango umano sa alak ang suspek na naghahanap ng plato sa kusina.
Maya-maya pa, nakarinig sila ng magkakasunod na putok ng baril at nang kanilang tunguhin ang pinagmulan ay tumambad ang duguang mga biktima habang tumalilis ng takas ang suspek.
Alas-9:20 na ng gabi nang makaresponde ang mga tauhan ng Ayala Police Sub Station sa lugar ng krimen na agad nilang kinordon.
Dakong alas-7:50 nitong Martes ng umaga nang madakip ng mga tauhan ng Police Substation 5 at SWAT ang suspek sa may Lumbang Gate ng Dasmariñas Village sa Makati City, sa tulong ng duty guard dito.
Isinasailalim na siya ngayon sa imbestigasyon at nakatakdang sampahan ng kaukulang mga kaso.
- Latest
