Basketball coach nagpaputok ng baril sa liga: 1patay, 2 sugatan

MANILA, Philippines — Kalaboso ang isang coach ng basketball team makaraang magpaputok ng baril sa gitna ng liga na nagresulta ng pagkakasawi ng isang lalaki at pagkasugat pa ng dalawa, kamakalawa ng gabi sa Tondo, Maynila.

Kinilala ang naares­tong suspek na si Joseph Ariola, 40, negosyante, at nakatira sa Ugbo Street, Brgy. 96, Tondo. Nahaharap siya ngayon sa kasong homicide sa Manila City Prosecutor’s Office.

Nasawi habang gi­nagamot sa Tondo Me­dical Center ang 24-an­yos na si John Mathew Del Pilar, ng Simon Extension, Brgy. 103, Tondo.

Ginagamot naman sa nabanggit na pa­gamutan sina Johansel Austria, 18, na tinamaan ng bala sa kanang bahagi ng katawan; at si Andrea Enciso, 17, da­laga, nadaplisan naman ng bala sa katawan.

Sa paunang ulat ng Manila Police District-Raxabago Police Station, dakong alas-10 ng gabi nang maganap ang insidente sa loob ng Pumping Covered Basketball Court sa Brgy. 137 Balut, Tondo kung saan isang liga ang nagaganap sa pagitan ng koponan ng suspek at kabilang team.

Nagkainitan ang laro nang magkasakitan at magkahamunan ng away. Dito pumagitna si Ariola hanggang sa maging siya ay maitulak rin ng isa sa manlalaro ng kabilang koponan.

Dito naglabas ng baril si Ariola at walang habas na nagpaputok dahilan para tamaan ng bala ang tatlong manonood, na mabilis na naisugod sa nabanggit na pagamutan.