P36 milyong puslit na sibuyas, nasamsam

MANILA, Philippines — Patuloy na nagaganap ang operasyon ng mga smugglers ng gulay makaraang nasa P36 milyong halaga ng sibuyas ang masabat ng mga tauhan ng Bureau of Customs-Port of Cagayan de Oro sa Misamis Oriental nitong Huwebes.

Sa ulat ng BOC, may 12 container vans ang nasabat sa Mindanao International Container Terminal Port sa Tagoloan, Misamis Oriental makaraang makatanggap si Elvira Cruz, district port collector, ng impormasyon sa posibleng maling deklarasyon ng agricultural product.

Nanggaling ang shipment sa China at naka-consign sa Frankie Trading Enterprises at Primex Export and Import Producer. Idineklara nila ang shipment na ‘spring roll patti’ at ‘plain churros’.

Ngunit nang buksan ang mga container vans nang magsagawa ng 100% physical examination, bumungad ang mga pula at puting mga sibuyas na may kabuuang halaga na P36 milyon.

Naglabas na ang BOC ng warrant of seizue and detention laban sa shipment sa ilalim ng RA 10863 o Customs Modernization and Tariff Act at RA 10845 o Anti-Agricultural Smuggling Act.

Nangako si Cruz na tuluy-tuloy ang kanilang maigting na kampanya laban sa agricultural smuggling sa Northern Mindanao, habang hindi tumitigil ang mga smugglers sa kanilang iligal na gawain na nakakaapekto sa industriya ng pagsasaka sa bansa.