3 tiklo sa shabu, boga sa Valenzuela

MANILA, Philippines — Arestado ang tatlo katao kabilang ang isang ginang  matapos makuhanan ng shabu at baril sa buy-bust operation kahapon ng umaga sa Valenzuela City.

Kinilala ni Valenzuela police chief Col. Salvador Destura Jr, ang mga suspek na sina Ronnie Casador alyas Ronron, 34; Danilo Gaspar, 52 at Mercy Macaday, 47.

Ayon kay PSSg Ana Liza Antonio, dakong alas-8 ng umaga nang magsagawa ang mga operatiba ng Station Drug Enforcement Unit (SDEU ng buy-bust operation sa Mindanao Avenue, Brgy. Ugong kung saan isang undercover police ang nagawang makipagtransaksyon sa mga suspek.

Nang tanggapin ang marked money mula sa poseur-buyer kapalit ng sachet ng shabu,  agad na  inaresto ng mga operatiba ang mga suspek.

Nakuha sa mga suspek ang humigi’t kumulang 7 gramo ng hinihinalang shabu at isang cal. 38 revolver na may apat na bala.

Inihahanda na ang kaukulang kaso laban sa mga nadakip.