Quezon City isinailalim sa 'moderate risk' dahil sa pagtaas ng COVID-19 cases

MANILA, Philippines — Isinailalim sa "moderate risk" na klasipikasyon ang Quezon City dahil sa pagtaas ng kaso ng COVID-19 sa naturang lungsod sa mga nagdaang linggo.

Anang lokal na pamahalaan ng QC, mula kasi sa 221 kumpirmadong kaso ng COVID-19 ay umakyat ito sa 245.

"Umakyat na rin sa 'moderate' risk ang level ng lungsod ayon sa DOH at OCTA Research. Ibig sabihin, medyo mataas ang risk exposure sa COVID-19," saad nila sa sa isang paskil, Linggo.

Dagdag pa rito, umakyat din anila ang positivity rate ng nasabing lungsod mula 12.9% na ngayo'y 15.2% na.

"Nagkaroon din ng pagtaas sa positivity rate na ngayon ay nasa 15.2% na mula sa 12.9%. Ang positivity rate ay patungkol sa bilang ng nagpopositibo mula sa mga na-test para sa COVID-19." 

Samantala, bumaba naman ang reproduction number o R0 ng QC sa 1.29.

"Ang R0 na mas mababa sa 1 ay nangangahulugan na ang bawat kumpirmadong kaso ng COVID-19 ay may maliit na tsansang makapanghawa, o magdulot ng bagong infection," paliwanang nila.

Dahil dito, pinaaalahanan ng QC LGU ang kanilang mga residente na huwag maging kampante at patuloy pa ring obserbahan ang COVID-19 protocols tulad ng pagsusuot ng face mask at pag-iwas sa "3cs" — confined, crowded at close-contact settings.

Batay sa pinakabagong datos ng Health Department, nasa 37,805 na ang kasalukuyafg aktibong kaso ng COVID-19 sa bansa. — Philstar.com intern Vivienne Audrey Angeles