Ilang school service vehicles, wala pang balak mag-operate
MANILA, Philippines — Hindi muna mag-ooperate ang ilang mga school service vehicles para maghatid sundo sa mga mag-aaral ngayong pasukan.
Ayon kay Celso dela Paz, presidente ng Nagkakaisang Alyansa Samahan ng School Service sa Pilipinas, dalawang araw lamang ngayon ang pasok sa ilang mga paaralan dahil blended learning pa rin ngayong Agosto ang ipinaiiral ng maraming paaralan.
Sinabi ni dela PAz na kung mag-ooperate sila ngayong Agosto na dalawang araw lamang ang pasok ng mga estudyante, maaaring hindi sila kumita dahil sa pambayad sa kanilang driver at mataas ang halaga ng diesel.
Anya hindi rin nila alam ang presyong sisingilin sa mga magulang ng mag-aaral sa dalawang araw na pasok at hindi papayag ang mga magulang na gawing arawan ang kanilang singil sa mga seserbisyuhang mag-aaral.
Sinasabing hihirit din ng mga magulang na babaan ang singil sa school service.
Una nang nagpalabas ng anunsyo ang Land Transportation Franchising and Regulatory Board (LTFRB) na balik operasyon na ang school transport services dahil maraming paaralan na ang magsasagawa ng face-to-face classes.
Sinasabing sa Nobyembre pa inaasahang fully implemented ang pasok ng mga estudyante sa mga paaralan.
- Latest
