SCTEX may toll hike simula June 1
MANILA, Philippines — Magkakaroon ng toll rate adjustment para sa motoristang dumaraan sa Subic Clark Tarlac Expressway (SCTEX) epektibo sa Hunyo 1.
Ito ay makaraang aprubahan ng Toll Regulatory Board (TRB) ang toll rate adjustment ng North Luzon Expressway (NLEX) Corporation na dagdag na P0.78 kada kilometro para sa mga motoristang daraan sa SCTEX.
Sa ilalim ng bagong toll matrix, ang mga motorista na may Class 1 vehicles na bumibiyahe sa Mabalacat City patungong Tarlac ay sisingilin ng karagdagang P31.
Para naman sa mga may Class 2 vehicles na dumaraan sa parehong ruta, sisingilin sila ng karagdagang P61 habang ang mga motorista na may Class 3 vehicles ay magbabayad ng karagdagang P92.
Samantala, sisingilin naman ng karagdagang P49, P98, at P147 ang mga motorista na gumagamit ng Class 1, 2, at 3 vehicles, na dumaraan sa Mabalacat City at Tipo, Hermosa, Bataan na malapit sa Subic Freeport.
Hindi muna sisingilin ng bagong toll rates ang mga pampasaherong bus na daraan ng SCTEX sa susunod na tatlong buwan bilang ayuda ng kompanya sa bus sector.
- Latest
