Mas matindi pang trapik, asahan sa Hunyo – MMDA
MANILA, Philippines — Asahan na umano sa susunod na buwan ang mas lalong pagbigat ng trapiko dahil sa pagdami ng mga sasakyan sa mga kalsada sa Metro Manila na inaasahang lalampas sa pre-pandemic level, ayon sa Metropolitan Manila Development Authority (MMDA).
Sinabi ni MMDA Chairman Romando Artes na ang karaniwang bilang ng mga sasakyan sa mga lansangan sa Metro Manila bago ang halalan ay nasa 40,000.
“Yan po ay 5,000 short na lang noong pre-pandemic level na 405,000. Pero tandaan pa po natin, wala pa pong pasok,” ani Artes.
“Kung magkakaroon po ng face-to-face classes ngayong Hunyo, ay i-expect pa natin na mas marami pa, mukhang mabi-breach po yung 405,000 na pre-pandemic level,” aniya pa.
Isa pang punto dito ay ang mga bagong biniling sasakyan mula noong pandemya na maaaring tumaas sa “higit pa sa kalahating milyon.”
“So 16 to 17 percent po niyan ang pumapasok sa Metro Manila or nandito po sa Metro Manila, so expect po natin na mas maabot pa ‘yung daloy ng traffic ngayong Hunyo,” paliwanag ni Artes.
Upang matugunan ito, muling iginiit ni Artes ang panukala ng MMDA na i-adjust ang oras ng pagtatrabaho sa opisina ng gobyerno sa layuning maibsan ang matinding trapiko.
Matatandaang noong nakalipas na Abril nang imungkahi ng MMDA ang adjustment sa working hours ng government offices na alas-7 ng umaga hanggang alas-4:00 ng hapon.
Nakatakda na rin aniya, ang pulong nila kay Civil Service Chairman Karlo Nograles sa susunod na linggo para sa mungkahi na gawing 7 o’clock ang simula ng pasok ng mga kawani sa pamahalaan.
Binanggit din ni Artes ang panukalang baguhin ang number coding scheme na magbabawal sa ilang sasakyan sa mga pampublikong kalsada sa tuwing rush hour dalawang araw sa kada lingo.
- Latest