Voter’s Registration Act, puno ng butas - Comm. Garcia
MANILA, Philippines — Nanawagan sa susunod na Kongreso si Commission on Elections (Comelec) Commissioner George Garcia na amyendahan ang umiiral na Voter’s Registration Act na punumpuno umano ng butas dahilan para makaboto pa maging ang mga matagal nang patay.
Sinabi ni Garcia na aasikasuhin nila sa Comelec na maitulak ang pag-amiyenda sa naturang batas matapos ang halalan sa Mayo 9.
Ito ay makaraan ang mga ulat na nakarating sa kaniya na maging mga matagal nang patay na botante ay kasama pa rin sa ‘voters list’.
“Alam ninyo po, immediately after the elections, ipapangako ko po sa inyo aayusin po natin yung batas yung Republic Act 8189, ‘yung mga loopholes na ‘yan, ‘yung mga problema na yan,” ayon kay Garcia.
Nagpahayag din ang komisyuner ng pag-aalala sa posibleng kaguluhan sakaling maisama na ang ‘voter’s information’ sa National ID System.
Ipinaliwanag niya na nakuwestiyon ang National ID na dapat limitado lamang umano ang impormasyon na nakasaad dito. Kung masasama umano ang mga impormasyon na nasa voter’s ID ay maaaring malabag naman ang ‘data privacy’ ng mga Pilipino.
Dahil dito, nanawagan siya na kailangan pa rin na patuloy na mag-isyu ng voter’s ID para mas madaling makilala ang mga lehitimong botante at mapondohan na ito para tuluy-tuloy na ang pag-iimprenta.
- Latest