DOTr nagbabala sa mamemeke ng vaccination card

Kaugnay sa ipapatupad na ‘no vax, no ride’

MANILA, Philippines — Binalaan ng Department of Transportation (DOTr) ang mga nagbabalak gumamit ng pekeng vaccination card sa harap ng pag-arangkada sa darating na Lunes ng ‘no vax, no ride’ policy sa mga pampublikong sasakyan sa Metro Manila.

Ayon kay DOTr Undersecretary for Legal Affairs Reinier Paul Yebra na may parusang kulong at multa ang mga mahuhuling mamemeke ng vaccination card sa ilalim ng revised penal code.

Mayroon din anyang kaparusahang nakapaloob sa mga ordinansa na ipinasa ng mga local govt units (LGUs) na naglilimita sa paglabas ng bahay ng mga ‘di bakunadong indibiduwal.

Anya, sa ilalim ng Republic Act 113322 ay nagpaparusa rin ito sa mga pasaway sa gitna ng pandemic.

Ayon naman Kay Assistant Secretary for Road Transport and Infrastructure Mark Steven Pastor, ipapakalat nila ang mystery passenger upang bantayan na sinusunod ng mga driver at operator sa naturang polisiya.

Sa Lunes, January 17 makakatuwang ng DOTr ang Land Transportation Office, LTFRB, I-ACT, MMDA, mga LGUs at ng PNP sa pagpapatupad ng No Vax no ride policy.