Localized Traslacion simula na ngayon
MANILA, Philippines — Ngayong araw na magsisimula ang localized na Traslacion sa ilang lugar sa bansa.
Una nang nagpasya ang Simbahang Katolika na magsagawa na lamang ng localized Traslacion, kung saan bibisita ang Poong Nazareno sa iba’t ibang panig ng bansa, bilang bahagi ng adjustment na isinagawa ng simbahan dulot ng COVID-19 pandemic restrictions.
Ayon kay Fr. Douglas Badong, parochial vicar ng Minor Basilica of the Black Nazarene o Quiapo Church, ang imahe ng Itim na Nazareno ay unang dadalhin sa Our Lady of the Angels Church sa Quezon province.
“Magsisimula na ngayon (Lunes), ilalabas na ang Nazareno, pupunta na ito ng Atimonan,” ani Badong, sa panayam sa teleradyo.
Kaugnay nito, hinikayat din ng simbahan ang mga deboto na sa kani-kanilang simbahan na lamang muna mag-novena dahil mayroon naman nang imahe ng Itim na Nazareno doon.
Una nang inianunsiyo ng simbahan na suspendido muli ang tradisyunal na Traslacion sa Quiapo sa Enero 9 dahil na rin sa pangambang maging dahilan ito nang higit pang hawaan ng COVID-19.
“‘Yung Nazareno na muna ang lilipat, ang lalabas para sa mga deboto,” aniya pa.
Naglabas na rin naman ang Quiapo church ng schedule ng idaraos na localized Traslacion.
- Latest