NCR mayors humihingi ng dagdag na police support sa panahon ng ECQ

MANILA, Philippines — Tiniyak ni Department of the Interior and Local Government (DILG) Secretary Eduardo Año na magkakaroon ng mas masusing koordinasyon sa pagitan ng mga local government units (LGUs) at puwersa ng pulisya sa sandaling ipatupad na ang enhanced community quarantine (ECQ) sa Metro Manila.

Ayon kay Año, mismong ang mga Metro Mayors ang humi­ling sa kanila na magkaroon ng dagdag na police support sa panahon ng ECQ.

Aniya, ang mga pulis ay aasiste sa mga LGUs sa vaccination sites para sa kanilang pagbabakuna, gayundin sa mga ayuda distribution points, para naman sa gagawing pamamahagi ng financial aid sa mga mamamayang apektado ng ECQ.

Magtatalaga rin aniya sila ng mga pulis sa mga borders upang matiyak na maipatutupad ng maayos ang health and safety protocols laban sa COVID-19.

“It is the mayors that requested more PNP (Philippine Nationall Police) officers to be deployed in vaccination sites, ayuda distribution points, and along the borders to enforce the public health standards and community quarantine protocols,” ani Año.

Ang ECQ ay nakatakdang muling ipatupad sa Metro Manila simula sa Agosto 6 hanggang 20 upang mapigilan ang pagkalat pa ng COVID-19 partikular na ang Delta variant nito.