Birth registration, gagawin ng online sa Quezon City

MANILA, Philippines — Takdang magbukas ang Quezon City government ng kauna-unahang online birth registration portal  upang hindi na magpunta ang aplikante sa city hall  para makakuha ng birth certificate.

Ang programa ay bahagi ng  digitalization program ng QC  public services, na mas  kumbiniyente at mabilis na birth registration process na ang  requirements para dito ay ipadadala lamang gamit ang website at susuriin ng City Civil Registry Department (CCRD) para agad maproseso.

 “Tulad ng business at occupational permits natin na pwedeng mag-apply online, bubuksan na rin natin itong online portal for birth registration para ma-address natin ‘yung problema natin sa mga late at unregistered birth registration sa lungsod,” pahayag ni QC  Mayor Joy Belmonte .

Anya, ang innovation at automation ng serbisyo ay makakaiwas sa banta ng COVID-19 dahil hindi na pipila para sa application ng birth certificate.

“Karapatan ng mga bata ang mabigyan ng pangalan at pagkakakilanlan sa pamamagitan ng birth registration. Through this initiative, pwede nang mai-submit ang requirements at mai-check online para hindi na magpabalik-balik pa sa city hall. Hopefully, we can have the portal up and running before the year ends,” dagdag ni Mayor Belmonte.

Ayon kay City Civil Re­gistrar Salvador Cari?o Jr. sa ngayon ay nakikipag-usap na sila sa City Administrator’s Office at Information Techno­logy Development Department para maisama sa city’s QC E-Services portal ang birth registration.

Bukod sa birth registration, maaari ring mai-aplay sa portal ang ibang sertipikasyon tulad ng marriage registration at death registration oras na mailunsad na ito ngayong taon.