‘Maximum tolerance’ sa curfew violators, iniutos
MANILA, Philippines — Ngayong naglabas ng unified curfew hours, masusubok na naman ang pagtitiyaga at pagtitimpi ng mga pulis sa mga curfew violators sa Kalakhang Maynila.
Kahapon ay nagbilin si PNP Chief P/Gen. Guillermo Eleazar sa mga pulis na gawing maayos ang pakikitungo at ipatupad ang maximum tolerance sa mga mahuhuling lumalabag sa pinalawig na curfew sa Metro Manila.
Nagsimulang ipatupad noong linggo ang unified curfew hours na mula alas-10 ng gabi hanggang alas-4 ng madaling araw unified curfew sa MM sa gitna ng banta ng mas nakakahawang Delta variant .
Ayon sa PNP Chief, hindi na bago sa mga taga-Metro Manila ang mahabang mga curfew hours kaya inaasahan niyang susundin Ito ng karamihan. Aniya, paulit ulit ang pagsita sa mga pasaway subalit kailangan ang pasensiya at responsibilidad.
Umaasa naman si Eleazar na hindi na mauuwi sa arestuhan at komprontasyon sa pagitan ng mga tagapagpatupad ng batas at mga lumalabag.
Paalala ni Eleazar sa mga mamamayan, ang mas mahabang curfew ay para din sa kaligtasan nila at ng kanilang mga pamilya.
- Latest