‘Drive-thru vaccination facility’, itatayo ng Makati Med. Center
MANILA, Philippines — Inihayag ng Makati City Medical Center (MMC) ang planong pagtatayo ng sarili nilang ‘drive-thru vaccination facility’ bilang bahagi ng kanilang paglaban sa COVID-19.
Sinabi ni MMC Medical Director Dr. Saturnino Javier na ang ‘drive-thru facility’ ay itatayo sa Convergys open parking area na kadikit lamang ng pagamutan.
Magkakaroon ito ng 12 parking slots at inaasahan na matatapos ang pagbakuna sa isang pasyente sa loob lamang ng 27 minuto. Planado na umano kung saan paparada ang mga pasyente at kung paano sila mamo-monitor matapos ma-bigyan ng bakuna.
Pero nilinaw ni Javier na hindi tulad ng ibinibigay ng pamahalaan na libreng bakuna, magbabayad umano ang mga pasyente na nais magpabakuna sa kanila dahil sa bibilhin rin nila ang kanilang magiging suplay.
Ibabase naman umano ang presyo sa itinatakda ng pamahalaan at dadaan sa regulasyon. Hindi umano nila layon na kumita sa pagbakuna sa Pilipino ngunit layon lamang na makadagdag sa pagpapabilis ng vaccination sa bansa.
Ipinagmalaki naman ng MMC na nasa 98% na ng kanilang mga staff ang nabakunahan na kontra COVID-19.
- Latest
