Pagdagsa ng mga pasahero sa PITX, 24/7 tututukan
MANILA, Philippines — Magpapatupad ng round the clock deployment ng kapulisan si bagong talagang Southern Police District (SPD) Director P/BGen. Jimili Macaraeg sa Parañaque Integrated Terminal Exchange (PITX) dahil sa inaasahang pagdagsa ng mga pasahero kasunod ng pagluluwag sa quarantine status sa National Capital Region (NCR).
Sinabi ni PITX Corporate Affairs and Government Relations head Jason Salvador sa isinagawang weekly news forum na isinagawa ng Southern Metro Manila Press Club, na sa kasalukuyan ay nasa 40,000 pasahero ang dumadagsa kada araw sa PITX na inaasahang tataas pa ito sa 60,000 hanggang 80,000 commuters na maglalakbay pabalik at paluwas ng kanilang mga lalawigan.
Ayon sa SPD director, ang nakasasakop na Parañaque Sub-Station 2 sa ilalim ng pamumuno ni station commander P/Maj. Jolly Soriano, ay mahigpit na tututukan kung nasusunod ang minimum health protocols na itinakda ng Inter-Agency Task Force (IATF) , subalit hindi isasantabi ang pagbabantay sa kriminalidad.
Sa forum, tinalakay din ang mga plano at mga programa ng SPD alinsunod sa nais na ipatupad ni PNP chief, Gen. Guillermo Eleazar sa lahat ng district, police station at sub-stations.
- Latest
