Mga taga Quezon City, maaaring mag-claim ng cash aid hanggang Mayo 12

MANILA, Philippines — Inanunsiyo ng Quezon City government na may hanggang Mayo 12 na lamang ang mga kuwalipikadong benepisyaryo sa lungsod upang kuhanin ang cash aid na kaloob ng national government para sa mga residente sa NCR Plus areas na naapektuhan ng enhanced community quarantine (ECQ) mula Marso 29 hanggang Abril 11. Ayon sa lokal na pamahalaan, layunin nito na makapaglaan pa sila ng sapat na oras para rebyuhin at iproseso ang mga apela ng mga residente na may kinalaman sa ayuda mula sa national government.

“From today until Wednesday next week (May 12), that becomes the final window where qualified QCitizens can claim. We made this call so we could also attend to other deserving citizens who appealed or filed disputes to our grievances committee,” ayon kay QC Mayor Joy Belmonte, sa isang pahayag.

Magbubukas umano ang lokal na pamahalaan ng ilang sites sa bawat distrito ng lungsod kung saan maaaring magtungo ang mga qualified residents upang i-claim ang kanilang financial aid.

“Our next priority are those eligible individuals who were not recorded in the initial list. We understand that they’re also waiting for this aid to be able to buy food and other essentials for their families,” paliwanag naman ni City Administrator Mike Alimurung.

Upang matukoy naman kung kasama sila sa listahan ng mga benepisyaryo, pinayuhan ng lokal na pamahalaan ang mga residente na i-access ang listahan na nakapaskil sa kani-kanilang barangay o kaya ay sa official website ng Quezon City na www.quezoncity.gov.ph.