MANILA, Philippines — Nadakip na ng mga awtoridad ang lalaking itinuturong suspek sa pagpatay sa isang 15-anyos na binatilyo na binaril umano nito matapos lamang na tumangging sumunod sa kanyang iniuutos dito sa Brgy. Pinagbuhatan, Pasig City.
Nakilala ang nadakip na suspect na si Anwar Pascan E. Piang, 19, na unang nakilala sa alyas na ‘Negro’. Nasabat ito sa isinagawang follow-up operation ng mga tauhan ng Pasig City Police, sa isang night market sa Pasay City, sa pangunguna ni PSSgt Joselito Sedeño.
Narekober din umano ng mga pulis mula sa suspek ang baril na ginamit nito sa pagpatay sa biktimang si Raprap Misa, 15, isang Grade 7 student at residente ng V. Baltazar St., Brgy. Pinagbuhatan, dakong alas-4:00 ng madaling araw noong Miyerkules.
Idinadahilan umano ni Piang sa mga pulis na aksidente lamang niyang nabaril ang biktima, na nagresulta sa pagkamatay nito.
Ayon kay Raul Misa, ama ng biktima, ilang kapitbahay ang nagkuwento sa kanya na bago ang krimen ay ilang ulit nang inuutusan ng suspek ang biktima na bumili sa tindahan.
Gayunman, nang muli umanong utusan ng suspek ang biktima na bumili ng softdrinks ay tumanggi na ito at sinabing pagod na siya at gusto na niyang magpahinga.
Ikinagalit umano ito ng suspek at naglabas ng baril at pinaglaruan ito sa harap ng biktima.
“Naglabas yata ng baril pinaglaruan po sa harap ng anak ko. Merong witness na nagsabi sa akin na dalawang kalabit, hindi pumutok. ‘Yung pangatlong kalabit, ‘yun na po ‘yun,” dagdag pa ng ama.